سر پہ سجنے کو جو تیار ہے میرے اندر

سر پہ سجنے کو جو تیار ہے میرے اندر

گرد آلود سی دستار ہے میرے اندر

جس کے مر جانے کا احساس بنا رہتا ہے

مجھ سے بڑھ کر کوئی بیمار ہے میرے اندر

روز اشکوں کی نئی فصل اگا دیتا ہے

ایک بوڑھا سا زمیندار ہے میرے اندر

کتنا گھنگھور اندھیرا ہے مری رگ رگ میں

اس قدر روشنی درکار ہے میرے اندر

دب کے مر جاؤں گا اک روز میں اپنے نیچے

ایک گرتی ہوئی دیوار ہے میرے اندر

کون دیتا ہے یہ ہر وقت گواہی میری

کون یہ میرا طرف دار ہے میرے اندر

میرے لکھے ہوئے ہر لفظ کو جھٹلاتا ہے

مجھ سے بڑھ کر کوئی فن کار ہے میرے اندر

sar pe sajne ko jo tayyar hai mere andar

gard alud si dastar hai mere andar

jis ke mar jane ka ehsas bana rahta hai

mujh se barh kar koi bimar hai mere andar

roz ashkon ki nai fasl uga deta hai

ek burha sa zamindar hai mere andar

kitna ghanghor andhera hai miri rag rag mein

is qadar raushni darkar hai mere andar

dab ke mar jaunga ik roz main apne niche

ek girti hui diwar hai mere andar

kaun deta hai ye har waqt gawahi meri

kaun ye mera taraf dar hai mere andar

mere likhe hue har lafz ko jhutlata hai

mujh se barh kar koi fan kar hai mere andar