مسلسل اشک باری کر رہا تھا

مسلسل اشک باری کر رہا تھا

میں اپنی آبیاری کر رہا تھا

مجھے وہ خواب پھر سے دیکھنا تھا

میں خود پہ نیند طاری کر رہا تھا

کئی دن تک تھا میری دسترس میں

میں اب دریا کو جاری کر رہا تھا

مجھے رک رک کے پنچھی دیکھتے تھے

میں پتھر پر سواری کر رہا تھا

گزرنا تھا بہت مشکل ادھر سے

دریچہ چاند ماری کر رہا تھا

کوئی ایٹم تھا میرے جسم و جاں میں

میں جس کی تاب کاری کر رہا تھا

سفینے سب کے سب غرقاب کر کے

سمندر آہ و زاری کر رہا تھا

مجھے فطرت بھی گھستی جا رہی تھی

میں خود بھی ریگ ماری کر رہا تھا

میری ڈیوٹی تھی خیموں کی حفاظت

مگر میں آب داری کر رہا تھا

ستارے ٹمٹمانا رک گئے تھے

میں پھر اختر شماری کر رہا تھا

مجھے بھڑنا تھا کس وحشی سے لیکن

میں کس پاگل سے یاری کر رہا تھا

بہت سے کام کرنے تھے لیاقتؔ

جنہیں میں باری باری کر رہا تھا

musalsal ashk bari kar raha tha

main apni abiyari kar raha tha

mujhe wo khwab phir se dekhna tha

main khud pe nind tari kar raha tha

kai din tak tha meri dastaras mein

main ab dariya ko jari kar raha tha

mujhe ruk ruk ke panchhi dekhte the

main patthar par sawari kar raha tha

guzarna tha bahut mushkil idhar se

daricha chand mari kar raha tha

koi aitam tha mere jism-o-jan mein

main jis ki tab kari kar raha tha

safine sab ke sab gharqab kar ke

samundar ah-o-zari kar raha tha

mujhe fitrat bhi ghisti ja rahi thi

main khud bhi reg mari kar raha tha

meri diyuti thi khemon ki hifazat

magar main ab dari kar raha tha

sitare timtimana ruk gae the

main phir akhtar shumari kar raha tha

mujhe bhirna tha kis wahshi se lekin

main kis pagal se yari kar raha tha

bahut se kam karne the liyaqat

jinhen mein bari bari kar raha tha