خامشی کو صدا میں رکھا گیا

خامشی کو صدا میں رکھا گیا

ایک جادو ہوا میں رکھا گیا

چاک جاں سے اتار کر کوزہ

صحن آب و ہوا میں رکھا گیا

پھر مرتب کیے گئے جذبات

عشق کو ابتدا میں رکھا گیا

سنگ بنیاد تھی خلاؤں کی

ایک پتھر ہوا میں رکھا گیا

ایک کونپل سجائی اچکن پر

ایک خنجر قبا میں رکھا گیا

ایک دریا اٹھا کے لایا گیا

دشت کرب و بلا میں رکھا گیا

مشتہر کی گئیں دعائیں بہت

اور اثر بد دعا میں رکھا گیا

مجھ کو تخلیق سے گزارا گیا

اور خدا کی رضا میں رکھا گیا

انکشافات ہو چکے سارے

معجزے کو انا میں رکھا گیا

khamushi ko sada mein rakha gaya

ek jadu hawa mein rakha gaya

chak jan se utar kar kuza

sehn-e-ab-o-hawa mein rakha gaya

phir murattib kiye gae jazbat

ishq ko ibtida mein rakha gaya

sang-e-buniyad thi khalaon ki

ek patthar hawa mein rakha gaya

ek konpal sajai achkan par

ek khanjar qaba mein rakha gaya

ek dariya utha ke laya gaya

dasht-e-karb-o-bala mein rakha gaya

mushtahar ki gain duaen bahut

aur asar bad dua mein rakha gaya

mujh ko takhliq se guzara gaya

aur khuda ki raza mein rakha gaya

inkishafat ho chuke sare

mojize ko ana mein rakha gaya