سرور و کیف ہے کچھ لذت بقا تو نہیں

سرور و کیف ہے کچھ لذت بقا تو نہیں

یہ ابتدا کی حقیقت ہے انتہا تو نہیں

ستارے تیر نگاہوں سے دیکھتے کیوں ہیں

مرا جنوں کوئی میرے لئے بلا تو نہیں

فریب کھائے نہ کیوں کر کسی کا سادہ دل

زمانہ ساز نگاہوں سے آشنا تو نہیں

کہیں گری تو ہے بجلی ذرا نظر کیجے

کسی غریب کی پلٹی ہوئی دعا تو نہیں

ہزار بار خزاں سے بہار ٹکرائی

چمن کا راز مگر آج تک کھلا تو نہیں

مزاج حسن مکدر ہے کیوں خدا جانے

اس آئنہ میں کوئی بال آ گیا تو نہیں

ہجوم ناز میں جلوہ فریبیوں کے سوا

کلیمؔ اور کوئی حادثہ ہوا تو نہیں

surur-o-kaif hai kuchh lazzat-e-baqa to nahin

ye ibtida ki haqiqat hai intiha to nahin

sitare tir nigahon se dekhte kyun hain

mira junun koi mere liye bala to nahin

fareb khae na kyun kar kisi ka sada dil

zamana saz nigahon se ashna to nahin

kahin giri to hai bijli zara nazar kije

kisi gharib ki palti hui dua to nahin

hazar bar khizan se bahar takrai

chaman ka raz magar aj tak khula to nahin

mizaj-e-husn mukaddar hai kyun khuda jane

is aina mein koi bal a gaya to nahin

hujum-e-naz mein jalwa farebiyon ke siwa

kalim aur koi hadisa hua to nahin