Arooz is now on the App Store, for iPhone and iPad. Download →

All poetry

فضا میں بوئے گل مشک بار ہے کہ نہیں

Lutfullah Khan Nazmi (1907–1985)

فضا میں بوئے گل مشک بار ہے کہ نہیں

ہوا کے دوش پہ پیغام یار ہے کہ نہیں

سوال یہ نہیں وہ دوست دار ہے کہ نہیں

سخن شناس دل غم گسار ہے کہ نہیں

کرو نہ ذکر سبو زر نگار ہے کہ نہیں

علاج تشنگئ بادہ خوار ہے کہ نہیں

کسی گدائے گرسنہ کو ہے یہ ہوش کہاں

کوئی نگار لب جوئبار ہے کہ نہیں

کیا ہے عزم سفر اب نہیں تردد کچھ

کہیں کوئی شجر سایہ دار ہے کہ نہیں

ہے استواریٔ عاشق کی بس یہی پہچان

رہ وفا میں رواں سوئے دار ہے کہ نہیں

اگر ہو رزق کا آجر پہ انحصار تو یہ

خلاف وعدۂ پروردگار ہے کہ نہیں

چمن ہے جن کے تصرف میں ان سے یہ پوچھو

لہو ہمارا شریک بہار ہے کہ نہیں

کشاکش رہ ہستی سے تو پریشاں ہے

حقیقتوں سے یہ نظمیؔ فرار ہے کہ نہیں