وہ کیا گیا مسلط مرا حال دیکھنے کو

وہ کیا گیا مسلط مرا حال دیکھنے کو

کہ عروج زندگانی کا زوال دیکھنے کو

یہ عجیب مسئلہ ہے مرے اس کے درمیاں بھی

وہ جواب لے کے آیا ہے سوال دیکھنے کو

تو بدل کے اپنا چہرہ بڑا شادماں ہے لیکن

کوئی آئنہ تو رکھ لے خد و خال دیکھنے کو

جہاں کل بسا ہوا تھا مرا شہر اب ہے ملبہ

مجھے اس نے زندگی دی یہ وبال دیکھنے کو

نہ تو داد کی تمنا نہ تو شہرتوں کی خواہش

مرا فن ہی آئنہ ہے یہ کمال دیکھنے کو

جو کھڑا ہوا ہے انورؔ لئے سنگ میرے آگے

وہ ہے مضطرب لہو کا یہ ابال دیکھنے کو

wo kiya gaya musallat mira hal dekhne ko

ke uruj zindagani ka zawal dekhne ko

ye ajib masala hai mire us ke darmiyan bhi

wo jawab le ke aya hai sawal dekhne ko

tu badal ke apna chehra bara shadman hai lekin

koi aina to rakh le khad-o-khal dekhne ko

jahan kal basa hua tha mira shahr ab hai malba

mujhe us ne zindagi di ye wabal dekhne ko

na to dad ki tamanna na to shohraton ki khwahish

mira fan hi aina hai ye kamal dekhne ko

jo khara hua hai anwar liye sang mere age

wo hai muztarib lahu ka ye ubal dekhne ko