تھوڑا سا عکس چاند کے پیکر میں ڈال دے
Kaif Bhopali (1917–1991)تھوڑا سا عکس چاند کے پیکر میں ڈال دے
تو آ کے جان رات کے منظر میں ڈال دے
جس دن مری جبیں کسی دہلیز پر جھکے
اس دن خدا شگاف مرے سر میں ڈال دے
اللہ تیرے ساتھ ہے ملاح کو نہ دیکھ
یہ ٹوٹی پھوٹی ناؤ سمندر میں ڈال دے
آ تیرے مال و زر کو میں تقدیس بخش دوں
لا اپنا مال و زر مری ٹھوکر میں ڈال دے
بھاگ ایسے رہنما سے جو لگتا ہے خضر سا
جانے یہ کس جگہ تجھے چکر میں ڈال دے
اس سے ترے مکان کا منظر ہے بد نما
چنگاری میرے پھوس کے چھپر میں ڈال دے
میں نے پناہ دی تجھے بارش کی رات میں
تو جاتے جاتے آگ مرے گھر میں ڈال دے
اے کیفؔ جاگتے تجھے پچھلا پہر ہوا
اب لاش جیسے جسم کو بستر میں ڈال دے
thora sa aks chand ke paikar mein dal de
tu a ke jan rat ke manzar mein dal de
jis din miri jabin kisi dahliz par jhuke
us din khuda shigaf mire sar mein dal de
allah tere sath hai mallah ko na dekh
ye tuti phuti nao samundar mein dal de
a tere mal-o-zar ko main taqdis bakhsh dun
la apna mal-o-zar miri thokar mein dal de
bhag aise rahnuma se jo lagta hai khizr sa
jane ye kis jagah tujhe chakkar mein dal de
us se tire makan ka manzar hai bad numa
chingari mere phus ke chhappar mein dal de
main ne panah di tujhe barish ki rat mein
tu jate jate ag mire ghar mein dal de
ai kaif jagte tujhe pichhla pahar hua
ab lash jaise jism ko bistar mein dal de