بیمار محبت کی دوا ہے کہ نہیں ہے

بیمار محبت کی دوا ہے کہ نہیں ہے

میرے کسی پہلو میں قضا ہے کہ نہیں ہے

سنتا ہوں اک آہٹ سی برابر شب وعدہ

جانے ترے قدموں کی صدا ہے کہ نہیں ہے

سچ ہے کہ محبت میں ہمیں موت نے مارا

کچھ اس میں تمہاری بھی خطا ہے کہ نہیں ہے

مت دیکھ کہ پھرتا ہوں ترے ہجر میں زندہ

یہ پوچھ کہ جینے میں مزہ ہے کہ نہیں ہے

یوں ڈھونڈتے پھرتے ہیں مرے بعد مجھے وہ

وہ کیفؔ کہیں تیرا پتہ ہے کہ نہیں ہے

bimar-e-mohabbat ki dawa hai ke nahin hai

mere kisi pahlu mein qaza hai ke nahin hai

sunta hun ik ahat si barabar shab-e-waada

jane tire qadmon ki sada hai ke nahin hai

sach hai ke mohabbat mein hamen maut ne mara

kuchh is mein tumhari bhi khata hai ke nahin hai

mat dekh ke phirta hun tire hijr mein zinda

ye puchh ke jine mein maza hai ke nahin hai

yun dhundte phirte hain mire baad mujhe wo

wo kaif kahin tera pata hai ke nahin hai