در و دیوار پہ شکلیں سی بنانے آئی

در و دیوار پہ شکلیں سی بنانے آئی

پھر یہ بارش میری تنہائی چرانے آئی

زندگی باپ کی مانند سزا دیتی ہے

رحم دل ماں کی طرح موت بچانے آئی

آج کل پھر دل برباد کی باتیں ہیں وہی

ہم تو سمجھے تھے کہ کچھ عقل ٹھکانے آئی

دل میں آہٹ سی ہوئی روح میں دستک گونجی

کس کی خوش بو یہ مجھے میرے سرہانے آئی

میں نے جب پہلے پہل اپنا وطن چھوڑا تھا

دور تک مجھ کو اک آواز بلانے آئی

تیری مانند تری یاد بھی ظالم نکلی

جب بھی آئی ہے مرا دل ہی دکھانے آئی

dar-o-diwar pe shaklen si banane ai

phir ye barish meri tanhai churane ai

zindagi bap ki manind saza deti hai

rahm dil man ki tarah maut bachane ai

aj kal phir dil-e-barbad ki baten hain wahi

ham to samjhe the ke kuchh aql thikane ai

dil mein ahat si hui ruh mein dastak gunji

kis ki khush bu ye mujhe mere sirhane ai

main ne jab pahle pahal apna watan chhora tha

dur tak mujh ko ik awaz bulane ai

teri manind tiri yad bhi zalim nikli

jab bhi ai hai mira dil hi dikhane ai