میں تیرے پاس ہوں مجھ سے یہ کہہ رہا کوئی ہے

میں تیرے پاس ہوں مجھ سے یہ کہہ رہا کوئی ہے

تمام شب مری آنکھوں میں جاگتا کوئی ہے

دیا امید کا بجھتا ہے جلتی آنکھوں میں

کسی کے لب پہ مرے واسطے دعا کوئی ہے

پرانی باتوں کی یادیں بھکاریوں کی طرح

سوال کرتی ہیں ایوان دل پہ کیا کوئی ہے

گماں گزرتا ہے ہوتے ہوئے نہ ہونے کا

تری نگاہ میں جادو مگر نیا کوئی ہے

یہ خواب کا ہے سفر میں ہوں خواب رو کی طرح

نہ ابتدا ہی تھی کچھ اور نہ انتہا کوئی ہے

نہ وہ فضا نہ وہ چشمے نہ وادیاں نہ وہ لوگ

مگر یہ وہم مری راہ دیکھتا کوئی ہے

شکستہ دل تو اسے چھوڑ کر نہ جا غافلؔ

کہ تیرے ساز میں مضمر ابھی صدا کوئی ہے

main tere pas hun mujh se ye kah raha koi hai

tamam shab miri ankhon mein jagta koi hai

diya ummid ka bujhta hai jalti ankhon mein

kisi ke lab pe mire waste dua koi hai

purani baton ki yaden bhikariyon ki tarah

sawal karti hain aiwan-e-dil pe kya koi hai

guman guzarta hai hote hue na hone ka

tiri nigah mein jadu magar naya koi hai

ye khwab ka hai safar mein hun khwab ro ki tarah

na ibtida hi thi kuchh aur na intiha koi hai

na wo faza na wo chashme na wadiyan na wo log

magar ye wahm miri rah dekhta koi hai

shikasta dil to use chhor kar na ja ghafil

ke tere saz mein muzmar abhi sada koi hai