جب بھی زلفوں کو ترے رخ پہ بکھرتے دیکھا

جب بھی زلفوں کو ترے رخ پہ بکھرتے دیکھا

ہو کے شرمندہ گھٹاؤں کو گزرتے دیکھا

دل سے چپ چاپ تجھے جب بھی گزرتے دیکھا

یاد ماضی کا ہر اک نقش ابھرتے دیکھا

کتنے خوابوں کو شب و روز بکھرتے دیکھا

پھر بھی اک پل نہ زمانے کو ٹھہرتے دیکھا

بات کچھ ان کی جوانی پہ ہی موقوف نہیں

چڑھتے دریا کو بھی اک روز اترتے دیکھا

آئی وہ روشنی حالات کے بازاروں میں

اپنے سائے سے بھی ہر شخص کو ڈرتے دیکھا

کونپلیں پھوٹی ہیں شاخوں پہ نئے موسم کی

جس گھڑی جور خزاں حد سے گزرتے دیکھا

بحر الفت میں تصور ہی کہاں ساحل کا

ڈوبنے والے کو ہی پار اترتے دیکھا

راحتیں موت ہیں انسان کے حق میں عارفؔ

دل کی فطرت کو مصائب میں سنورتے دیکھا

jab bhi zulfon ko tire rukh pe bikharte dekha

ho ke sharminda ghataon ko guzarte dekha

dil se chup chap tujhe jab bhi guzarte dekha

yad mazi ka har ik naqsh ubharte dekha

kitne khwabon ko shab-o-roz bikharte dekha

phir bhi ik pal na zamane ko thaharte dekha

bat kuchh un ki jawani pe hi mauquf nahin

charhte dariya ko bhi ik roz utarte dekha

ai wo raushni halat ke bazaron mein

apne sae se bhi har shakhs ko darte dekha

konpalen phuti hain shakhon pe nae mausam ki

jis ghari jaur-e-khizan had se guzarte dekha

bahr-e-ulfat mein tasawwur hi kahan sahil ka

dubne wale ko hi par utarte dekha

rahaten maut hain insan ke haq mein arif

dil ki fitrat ko masaib mein sanwarte dekha