آداب جنوں اہل نظر بھول گئے ہیں

آداب جنوں اہل نظر بھول گئے ہیں

جیتے تو ہیں جینے کا ہنر بھول گئے ہیں

کیا اہل سفر ذوق سفر بھول گئے ہیں

رستے میں ہیں منزل کی خبر بھول گئے ہیں

غم بھول گئے غم کا اثر بھول گئے ہیں

تم کیا ملے ہم خود کو مگر بھول گئے ہیں

ہجرت کے عذابوں میں بسر ایسی ہوئی ہے

اک عمر سے ہم اپنا نگر بھول گئے ہیں

دنیا کے غم اپنوں کے ستم وقت کے تیور

کیا کیا نہ مرے دیدۂ تر بھول گئے ہیں

طوفاں پہ ہی رکھتے ہیں نظر اہل زمانہ

موجوں کی سیاست کو مگر بھول گئے ہیں

وہ گرمیٔ حالات نہ ذہنوں میں وہ ہلچل

کیا حادثے آنا ہی ادھر بھول گئے ہیں

کیا بات تھی قاتل سے جو منسوب ہوئی تھی

مقتل میں جھکائے ہوئے سر بھول گئے ہیں

گلشن کی فضاؤں میں گھٹن آ گئی کتنی

ہنسنے کی ادا تک گل تر بھول گئے ہیں

جو ڈال رہے تھے کبھی سورج پہ کمندیں

وہ لوگ اجالوں کا سفر بھول گئے ہیں

آغاز سفر اپنا کیا ہم نے جہاں سے

ہم رکھ کے وہیں زاد سفر بھول گئے ہیں

تم اگلی شرافت کا سبق پھر سے پڑھانا

اس دور کے انسان اگر بھول گئے ہیں

عارفؔ میں گلہ کس سے کروں بے اثری کا

طالع ہی مرے باب اثر بھول گئے ہیں

adab-e-junun ahl-e-nazar bhul gae hain

jite to hain jine ka hunar bhul gae hain

kya ahl-e-safar zauq-e-safar bhul gae hain

raste mein hain manzil ki khabar bhul gae hain

gham bhul gae gham ka asar bhul gae hain

tum kya mile ham khud ko magar bhul gae hain

hijrat ke azabon mein basar aisi hui hai

ik umr se ham apna nagar bhul gae hain

duniya ke gham apnon ke sitam waqt ke tewar

kya kya na mire dida-e-tar bhul gae hain

tufan pe hi rakhte hain nazar ahl-e-zamana

maujon ki siyasat ko magar bhul gae hain

wo garmi-e-halat na zehnon mein wo halchal

kya hadse ana hi idhar bhul gae hain

kya bat thi qatil se jo mansub hui thi

maqtal mein jhukae hue sar bhul gae hain

gulshan ki fazaon mein ghutan a gai kitni

hansne ki ada tak gul-e-tar bhul gae hain

jo dal rahe the kabhi suraj pe kamanden

wo log ujalon ka safar bhul gae hain

aghaz-e-safar apna kiya ham ne jahan se

ham rakh ke wahin zad-e-safar bhul gae hain

tum agli sharafat ka sabaq phir se parhana

is daur ke insan agar bhul gae hain

arif mein gila kis se karun be asari ka

tale hi mire bab-e-asar bhul gae hain