دور رہتے ہوئے نزدیک رگ جاں بھی رہے

دور رہتے ہوئے نزدیک رگ جاں بھی رہے

دشمن دل بھی رہے دل کے نگہباں بھی رہے

ڈوب جاتے ہیں کنارے بھی کبھی موجوں سے

اہل ساحل ذرا اندازۂ طوفاں بھی رہے

ان کا انداز محبت بھی نرالا دیکھا

مجھ میں شامل بھی رہے مجھ سے گریزاں بھی رہے

میں ترے قرب کا وہ دور بھلاؤں کیسے

تیرے گیسو مرے شانوں پہ پریشاں بھی رہے

جس پہ لوگوں کو فرشتوں کا گماں ہو جائے

کاش اس دور میں ایسا کوئی انساں بھی رہے

ہم کو منظور نہیں تھی جو نمائش اپنی

بزم میں مثل چراغ تہہ داماں بھی رہے

غم جاناں کا تعلق تو ہے دل سے لیکن

ہم وہی ہیں جو حریف غم دوراں بھی رہے

دیدۂ دل سے محبت کا تقاضا ہے یہی

تشنۂ دید رہے دید کا ارماں بھی رہے

آج دامن میں بس اک دولت غم ہے عارفؔ

ان کی الفت میں کبھی بے سر و ساماں بھی رہے

dur rahte hue nazdik rag-e-jan bhi rahe

dushman-e-dil bhi rahe dil ke nigahban bhi rahe

dub jate hain kinare bhi kabhi maujon se

ahl-e-sahil zara andaza-e-tufan bhi rahe

un ka andaz-e-mohabbat bhi nirala dekha

mujh mein shamil bhi rahe mujh se gurezan bhi rahe

main tire qurb ka wo dur bhulaun kaise

tere gesu mire shanon pe pareshan bhi rahe

jis pe logon ko farishton ka guman ho jae

kash is daur mein aisa koi insan bhi rahe

ham ko manzur nahin thi jo numaish apni

bazm mein misl-e-charagh-e-tah-e-daman bhi rahe

gham janan ka taalluq to hai dil se lekin

ham wahi hain jo harif-e-gham-e-dauran bhi rahe

dida-e-dil se mohabbat ka taqaza hai yahi

tishna-e-did rahe did ka arman bhi rahe

aj daman mein bas ik daulat-e-gham hai arif

un ki ulfat mein kabhi be sar-o-saman bhi rahe