سحر جب بستر راحت سے وہ رشک قمر اٹھا

سحر جب بستر راحت سے وہ رشک قمر اٹھا

غلامی اس کی میں خورشید لے تیغ و سپر اٹھا

ابھی تسکیں ہوئی تھی اک ذرا فریاد و زاری سے

لگا دل مضطرب ہونے کہ پھر درد جگر اٹھا

گلے پر میرے خنجر پھیرتا وہ اور بھی لیکن

ہوئی مجھ سے خطا اتنی کہ میں فریاد کر اٹھا

نہیں معلوم اے یارو صباؔ کے دل میں کیا آیا

ابھی جو بیٹھے بیٹھے وہ یکایک آہ کر اٹھا

sahar jab bistar-e-rahat se wo rashk-e-qamar utha

ghulami us ki main khurshid le tegh-o-sipar utha

abhi taskin hui thi ik zara fariyad-o-zari se

laga dil muztarib hone ke phir dard-e-jigar utha

gale par mere khanjar pherta wo aur bhi lekin

hui mujh se khata itni ke main fariyad kar utha

nahin maalum ai yaro saba ke dil mein kya aya

abhi jo baithe baithe wo yakayak ah kar utha