Arooz is now on the App Store, for iPhone and iPad. Download →

All poetry

جب سر شام کوئی یاد مچل جاتی ہے

Kaleem Usmani (1928–2000)

جب سر شام کوئی یاد مچل جاتی ہے

دل کے ویرانے میں اک شمع سی جل جاتی ہے

جب بھی آتا ہے کبھی ترک تمنا کا خیال

لے کے اک موج کہیں دور نکل جاتی ہے

یہ ہے مے خانہ یہاں وقت کا احساس نہ کر

گردش وقت یہاں جام میں ڈھل جاتی ہے

خواہش زیست غم مرگ غم سود و زیاں

زندگی چند کھلونوں سے بہل جاتی ہے

جب وہ ہنستے ہوئے آتے ہیں خیالوں میں کلیمؔ

شام غم صبح مسرت میں بدل جاتی ہے