اس کو چھونے کو کئی ہاتھ نکل کر آئے

اس کو چھونے کو کئی ہاتھ نکل کر آئے

چاند سے کس نے کہا تھا کہ وہ چھت پر آئے

ہو اٹھا پھر سے سیاست میں سمندر منتھن

زہر پینے کے لئے پھر کوئی شنکر آئے

تم نے آنکھیں تو کھلی رکھی ہیں اپنی لیکن

دل کا دروازہ کھلے تب کوئی اندر آئے

میں تو فرہاد نہیں قیس بھی رانجھا بھی نہیں

کیوں مری سمت ہر اک سمت سے پتھر آئے

غم میں ڈوبی ہوئی غزلوں کے جو آنسو پونچھے

ایسا کوئی تو زمانے میں سخنور آئے

میں وہ دریا ہوں جو گھر سے کبھی نکلا ہی نہیں

پیاس لے کر میری چوکھٹ پہ سمندر آئے

us ko chhune ko kai hath nikal kar ae

chand se kis ne kaha tha ke wo chhat par ae

ho utha phir se siyasat mein samundar manthan

zahr pine ke liye phir koi shankar ae

tum ne ankhen to khuli rakhi hain apni lekin

dil ka darwaza khule tab koi andar ae

main to farhad nahin qais bhi ranjha bhi nahin

kyun miri samt har ik samt se patthar ae

gham mein dubi hui ghazlon ke jo ansu ponchhe

aisa koi to zamane mein sukhanwar ae

main wo dariya hun jo ghar se kabhi nikla hi nahin

pyas le kar meri chaukhat pe samundar ae