بگڑتا زخم ہنر آشکارا کرنا پڑا

بگڑتا زخم ہنر آشکارا کرنا پڑا

ہمیں بھی داد کا مرہم گوارا کرنا پڑا

بہت ہوس تھی مجھے رزق شعر کی لیکن

جو مل رہا تھا اسی پر گزارا کرنا پڑا

کھڑی تھی میرے لئے آنسوؤں کی بارش میں

سو تیری یاد سے ملنا گوارا کرنا پڑا

میں اس سے کم پہ زمانہ مرید کر لیتا

خیال عشق میں جتنا تمہارا کرنا پڑا

ملا نہ ایک بھی آنسو درون چشم مجھے

سو منہ چھپا کے دکھوں سے کنارہ کرنا پڑا

جو خواب نیند سے بھی چھپ کے دیکھتا تھا میں

کسی کی آنکھ سے اس کا نظارہ کرنا پڑا

نگاہ یار نے کچھ ایسے عیب ڈھونڈھ لیے

تمام کار محبت دوبارہ کرنا پڑا

اب اس سفر کی صعوبت کا کیا کہیں جس میں

قدم قدم پہ ہمیں استخارہ کرنا پڑا

سنبھالی جاتی نہیں روشنی زمیں سے کبیرؔ

سپرد خاک یہ کیسا ستارہ کرنا پڑا

bigarta zakhm-e-hunar ashkara karna para

hamen bhi dad ka marham gawara karna para

bahut hawas thi mujhe rizq sher ki lekin

jo mil raha tha usi par guzara karna para

khari thi mere liye ansuon ki barish mein

so teri yad se milna gawara karna para

main us se kam pe zamana murid kar leta

khayal-e-ishq mein jitna tumhara karna para

mila na ek bhi ansu darun-e-chashm mujhe

so munh chhupa ke dukhon se kinara karna para

jo khwab nind se bhi chhup ke dekhta tha main

kisi ki ankh se us ka nazara karna para

nigah-e-yar ne kuchh aise aib dhundh liye

tamam kar-e-mohabbat dobara karna para

ab is safar ki suubat ka kya kahen jis mein

qadam qadam pe hamen istikhara karna para

sambhali jati nahin raushni zamin se kabir

supurd-e-khak ye kaisa sitara karna para