جو عام سا اک سوال پوچھا تو کیا کہیں گے

جو عام سا اک سوال پوچھا تو کیا کہیں گے

کسی نے ہم سے بھی حال پوچھا تو کیا کہیں گے

جو سر کے بل خاک میں گڑے ہیں کسی نے ان سے

بلندیوں کا مآل پوچھا تو کیا کہیں گے

زمانے بھر کو تو ہم نے خاموش کر دیا ہے

جو دل نے بھی اک سوال پوچھا تو کیا کہیں گے

جنہیں ہمارے لہو کی لت ہے کسی نے ان سے

خمار رزق حلال پوچھا تو کیا کہیں گے

جسے غزل میں برت کے ہم داد پا چکے ہیں

کسی نے اس دکھ کا حال پوچھا تو کیا کہیں گے

اگر ہم اس کی خوشی میں خوش ہیں تو دوستوں نے

جواز حزن و ملال پوچھا تو کیا کہیں گے

یہ ہم جو اوروں کے دکھ کا ٹھیکا لیے ہوئے ہیں

کسی نے اس کا مآل پوچھا تو کیا کہیں گے

جو اپنی جانیں بچا کے خوش ہیں کبیرؔ ان سے

کسی نے بستی کا حال پوچھا تو کیا کہیں گے

jo am sa ik sawal puchha to kya kahenge

kisi ne ham se bhi hal puchha to kya kahenge

jo sar ke bal khak mein gare hain kisi ne un se

bulandiyon ka maal puchha to kya kahenge

zamane bhar ko to ham ne khamosh kar diya hai

jo dil ne bhi ik sawal puchha to kya kahenge

jinhen hamare lahu ki lat hai kisi ne un se

khumar rizq-e-halal puchha to kya kahenge

jise ghazal mein barat ke ham dad pa chuke hain

kisi ne is dukh ka hal puchha to kya kahenge

agar ham us ki khushi mein khush hain to doston ne

jawaz huzn-o-malal puchha to kya kahenge

ye ham jo auron ke dukh ka theka liye hue hain

kisi ne us ka maal puchha to kya kahenge

jo apni janen bacha ke khush hain kabir un se

kisi ne basti ka hal puchha to kya kahenge