طریق کہنہ پہ اب نظم گلستاں نہ رہے

طریق کہنہ پہ اب نظم گلستاں نہ رہے

مری بہار کو اندیشۂ خزاں نہ رہے

یہ آرزو ہے بدل جائے رسم شہر وفا

اداس حسن نہ ہو عشق سر گراں نہ رہے

پیام وصل سے دل باغ باغ ہو جائیں

لبوں پہ شکوۂ بے مہریٔ بتاں نہ رہے

طلوع مہر بڑے تزک و احتشام سے ہو

افق سیاہئ شب سے دھواں دھواں نہ رہے

سماعتوں پہ مسلسل ہو نغمگی کا نزول

نظر میں زشت مناظر کا کارواں نہ رہے

مسرتوں کے پھریرے جہاں میں لہرائیں

غم و الم کے لیے گوشۂ اماں نہ رہے

بروئے عدل سبھی اپنا اپنا حصہ لیں

اور احتمال غلط بخشیٔ مغاں نہ رہے

tariq-e-kohna pe ab nazm-e-gulsitan na rahe

miri bahar ko andesha-e-khizan na rahe

ye arzu hai badal jae rasm-e-shahr-e-wafa

udas husn na ho ishq sar giran na rahe

payam-e-wasl se dil bagh bagh ho jaen

labon pe shikwa-e-be mehri-e-butan na rahe

tulu-e-mehr bare tuzuk-o-ehtisham se ho

ufuq siyahi-e-shab se dhuan dhuan na rahe

samaaton pe musalsal ho naghmagi ka nuzul

nazar mein zisht manazir ka karwan na rahe

masarraton ke pharere jahan mein lahraen

gham-o-alam ke liye gosha-e-aman na rahe

baru-e-adl sabhi apna apna hissa len

aur ehtimal ghalat bakhshi-e-mughan na rahe