کشاد ذہن و دل و گوش کی ضرورت ہے

کشاد ذہن و دل و گوش کی ضرورت ہے

یہ زندگی ہے یہاں ہوش کی ضرورت ہے

سنائی دے گی یقیناً ضمیر کی آواز

مخاطبین سبک گوش کی ضرورت ہے

اب احتیاج نہیں سرو‌ قامتوں کی مجھے

مجھے تو اب کسی ہم دوش کی ضرورت ہے

خروش خم کا بھرم کھولنا ہے کیا مشکل

بس ایک رند بلا نوش کی ضرورت ہے

نگار صبح کے آنسو سمیٹنے کے لیے

گلوں کو وسعت آغوش کی ضرورت ہے

کہیں فقط متکلم سکوت کی حاجت

کہیں تکلم خاموش کی ضرورت ہے

kushad zehn-o-dil-o-gosh ki zarurat hai

ye zindagi hai yahan hosh ki zarurat hai

sunai degi yaqinan zamir ki awaz

mukhatibin subuk gosh ki zarurat hai

ab ehtiyaj nahin sarw qamaton ki mujhe

mujhe to ab kisi ham dosh ki zarurat hai

kharosh kham ka bharam kholna hai kya mushkil

bas ek rind-e-bala nosh ki zarurat hai

nigar-e-subh ke ansu sametne ke liye

gulon ko wusat-e-aghosh ki zarurat hai

kahin faqat mutakallim sukut ki hajat

kahin takallum khamosh ki zarurat hai