کتنی سزا ملی ہے مجھے عرض حال پر

کتنی سزا ملی ہے مجھے عرض حال پر

پہرے لگے ہوئے ہیں مری بول چال پر

کہتے ہیں لوگ جوشش فصل بہار ہے

پھولوں کا جب مزاج نہ ہو اعتدال پر

تو اپنی سسکیوں کو دبا اپنے اشک پونچھ

اے دوست چھوڑ دے تو مجھے میرے حال پر

پھر آج عصمتوں کی جبیں ہے عرق عرق

تہمت لگی ہے پھر کسی مریم خصال پر

محسوس بارہا یہ ہوا ہے کہ زندگی

اک برف کی ڈلی ہے کف برشگال پر

kitni saza mili hai mujhe arz-e-hal par

pahre lage hue hain miri bol chal par

kahte hain log joshish-e-fasl-e-bahar hai

phulon ka jab mizaj na ho etidal par

tu apni siskiyon ko daba apne ashk ponchh

ai dost chhor de to mujhe mere hal par

phir aj ismaton ki jabin hai araq araq

tohmat lagi hai phir kisi maryam khisal par

mahsus barha ye hua hai ke zindagi

ik barf ki dali hai kaf-e-barshgal par