یہ تو نہیں کہ ہم پہ ستم ہی کبھی نہ تھے

یہ تو نہیں کہ ہم پہ ستم ہی کبھی نہ تھے

اتنا ضرور تھا کہ وہ نا گفتنی نہ تھے

اے چشم التفات یہ کیا ہو گیا تجھے

تیری نظر میں ہم تو کبھی اجنبی نہ تھے

پھرتے ہیں آفتاب زدہ کائنات میں

ہم پر کسی کی زلف کے احساں کبھی نہ تھے

پامال کر دیا جو فلک نے تو کیا کہیں

ہم تو کسی کمال کے بھی مدعی نہ تھے

کیا جرم تھا یہ آج بھی ہم پر نہیں کھلا

یہ علم ہے کہ اہل جنوں کشتنی نہ تھے

ہر لمحہ تیرے عشق میں عمر ابد بنا

جو دن بھی زندگی کے ملے عارضی نہ تھے

مرجھا کے بھی گئی نہ مہک جسم ناز کی

یہ موتیے کے پھول کوئی کاغذی نہ تھے

یاران شہر عشق میں بے آبرو ہوئے

ہم پر تو مہرباں وہ کبھی تھے کبھی نہ تھے

اقلیم عاشقی کو دیا دین شاعری

ہم صاحب کتاب تھے گرچہ نبی نہ تھے

ہم جن کی نذر کرتے جواہر کلام کے

طاہرؔ ہمارے شہر میں وہ جوہری نہ تھے

ye to nahin ke ham pe sitam hi kabhi na the

itna zarur tha ke wo na guftni na the

ai chashm-e-iltifat ye kya ho gaya tujhe

teri nazar mein ham to kabhi ajnabi na the

phirte hain aftab zada kainat mein

ham par kisi ki zulf ke ehsan kabhi na the

pamal kar diya jo falak ne to kya kahen

ham to kisi kamal ke bhi muddai na the

kya jurm tha ye aj bhi ham par nahin khula

ye ilm hai ke ahl-e-junun kushtani na the

har lamha tere ishq mein umr-e-abad bana

jo din bhi zindagi ke mile arzi na the

murjha ke bhi gai na mahak jism naz ki

ye mutiye ke phul koi kaghzi na the

yaran-e-shahr-e-ishq mein be abru hue

ham par to mehrban wo kabhi the kabhi na the

iqlim-e-ashiqi ko diya din-e-shayari

ham sahab-e-kitab the garche nabi na the

ham jin ki nazr karte jawahir kalam ke

tahir hamare shahr mein wo jauhari na the