بجھتی رگوں میں نور بکھرتا ہوا سا میں

بجھتی رگوں میں نور بکھرتا ہوا سا میں

طوفان ننگ موج گزرتا ہوا سا میں

ہر شب اجالتی ہوئی بھیگی رتوں کے خواب

اور مثل عکس خواب بکھرتا ہوا سا میں

موج طلب میں تیر گیا تھا بس ایک نام

پھر یوں ہوا کہ جی اٹھا مرتا ہوا سا میں

اک دھند سی فلک سے اترتی دکھائی دے

پھر اس میں عکس عکس سنورتا ہوا سا میں

دست دعا اٹھا تو اٹھا اس کے ہی حضور

لیکن یہ کیا اسی سے مکرتا ہوا سا میں

اب کے ہوا چلے تو بکھر جاؤں دور تک

لیکن تری گلی میں ٹھہرتا ہوا سا میں

میں بجھ گیا تو کون اجالے گا تیرا روپ

زندہ ہوں اس خیال میں مرتا ہوا سا میں

اجملؔ وہ نیم شب کی دعائیں کہاں گئیں

اک شور آگہی ہے بکھرتا ہوا سا میں

bujhti ragon mein nur bikharta hua sa main

tufan nang-e-mauj guzarta hua sa main

har shab ujalti hui bhigi ruton ke khwab

aur misl-e-aks khwab bikharta hua sa main

mauj-e-talab mein tir gaya tha bas ek nam

phir yun hua ke ji utha marta hua sa main

ik dhund si falak se utarti dikhai de

phir is mein aks aks sanwarta hua sa main

dast-e-dua utha to utha us ke hi huzur

lekin ye kya usi se mukarta hua sa main

ab ke hawa chale to bikhar jaun dur tak

lekin tiri gali mein thaharta hua sa main

main bujh gaya tu kaun ujalega tera rup

zinda hun is khayal mein marta hua sa main

ajmal wo nim shab ki duaen kahan gain

ik shor-e-agahi hai bikharta hua sa main