بجائے گل مجھے تحفہ دیا ببولوں کا

بجائے گل مجھے تحفہ دیا ببولوں کا

میں منحرف تو نہیں تھا ترے اصولوں کا

ازالہ کیسے کرے گا وہ اپنی بھولوں کا

کہ جس کے خون میں نشہ نہیں اصولوں کا

نفس کا قرض چکانا بھی کوئی کھیل نہیں

وہ جان جائے گا انجام اپنی بھولوں کا

نئی تلاش کے یہ میر کارواں ہوں گے

بناتے جاؤ یوں ہی سلسلہ بگولوں کا

یہ آڑی ترچھی لکیریں بدل نہیں سکتیں

ہزار واسطہ دیتے رہو اصولوں کا

تمام فلسفۂ کائنات کھل جاتے

کہاں سے ٹوٹ گیا سلسلہ نزولوں کا

انہیں سے مجھ کو ملا عزم زندگی اجملؔ

میں جانتا ہوں کہ کیا ہے مقام پھولوں کا

bajae gul mujhe tohfa diya babulon ka

main munharif to nahin tha tire usulon ka

izala kaise karega wo apni bhulon ka

ke jis ke khun mein nasha nahin usulon ka

nafas ka qarz chukana bhi koi khel nahin

wo jan jaega anjam apni bhulon ka

nai talash ke ye mir-e-karwan honge

banate jao yun hi silsila bagulon ka

ye ari tirchhi lakiren badal nahin sakaten

hazar wasta dete raho usulon ka

tamam falsafa-e-kainat khul jate

kahan se tut gaya silsila nuzulon ka

unhen se mujh ko mila azm-e-zindagi ajmal

main janta hun ke kya hai maqam phulon ka