وہ خواب طلب گار تماشا بھی نہیں ہے

وہ خواب طلب گار تماشا بھی نہیں ہے

کہتے ہیں کسی نے اسے دیکھا بھی نہیں ہے

پہلی سی وہ خوشبوئے تمنا بھی نہیں ہے

اس بار کوئی خوف ہوا کا بھی نہیں ہے

اس چاند کی انگڑائی سے روشن ہیں در و بام

جو پردۂ شب رنگ پہ ابھرا بھی نہیں ہے

کہتے ہیں کہ اٹھنے کو ہے اب رسم محبت

اور اس کے سوا کوئی تماشا بھی نہیں ہے

اس شہر کی پہچان تھیں وہ پھول سی آنکھیں

اب یوں ہے کہ ان آنکھوں کا چرچا بھی نہیں ہے

کیوں بام پہ آوازوں کا دھمال ہے اجملؔ

اس گھر پہ تو آسیب کا سایہ بھی نہیں ہے

wo khwab talab gar tamasha bhi nahin hai

kahte hain kisi ne use dekha bhi nahin hai

pahli si wo khushbu-e-tamanna bhi nahin hai

is bar koi khauf hawa ka bhi nahin hai

is chand ki angrai se raushan hain dar-o-bam

jo parda-e-shab rang pe ubhra bhi nahin hai

kahte hain ke uthne ko hai ab rasm-e-mohabbat

aur us ke siwa koi tamasha bhi nahin hai

is shahr ki pahchan thin wo phul si ankhen

ab yun hai ke in ankhon ka charcha bhi nahin hai

kyun bam pe awazon ka dhamal hai ajmal

is ghar pe to aseb ka saya bhi nahin hai