ابھی تو فیصلہ باقی ہے شام ہونے دے
Kabir Ajmal (1967–2020)ابھی تو فیصلہ باقی ہے شام ہونے دے
سحر کی اوٹ میں مہتاب جاں کو رونے دے
تری نظر کے اشارے نہ روشنی بن جائیں
تو پھر یہ رات کہاں جگنوؤں کو سونے دے
بہت ہوا تو ہواؤں کے ساتھ رو لوں گا
ابھی تو ضد ہے مجھے کشتیاں ڈبونے دے
ہمارے بعد بھی کام آئے گی جنوں کی آگ
یہ آگ زندہ ہے اس کو نہ سرد ہونے دے
صدی سے مانگے گی اگلی صدی حساب گنہ
مرے سرشک کو لمحوں کے داغ دھونے دے
یہ غم مرا ہے تو پھر غیر سے علاقہ کیا
مجھے ہی اپنی تمنا کا بار ڈھونے دے
ببول سبز ہے باندھے حصار ناز اجملؔ
مجھے بھی اپنی زمیں میں چنار بونے دے
abhi to faisla baqi hai sham hone de
sahar ki ot mein mahtab jan ko rone de
tiri nazar ke ishare na raushni ban jaen
to phir ye rat kahan jugnuon ko sone de
bahut hua to hawaon ke sath ro lunga
abhi to zid hai mujhe kashtiyan dubone de
hamare baad bhi kam aegi junun ki ag
ye ag zinda hai us ko na sard hone de
sadi se mangegi agli sadi hisab-e-gunah
mire sarishk ko lamhon ke dagh dhone de
ye gham mira hai to phir ghair se ilaqa kiya
mujhe hi apni tamanna ka bar dhone de
babul sabz hai bandhe hisar-e-naz ajmal
mujhe bhi apni zamin mein chanar bone de