ہجوم سیارگاں میں روشن دیا اسی کا

ہجوم سیارگاں میں روشن دیا اسی کا

فصیل شب پر بھی گل کھلائے ہوا اسی کا

اسی کی شہ پر طرف طرف رقص موج گریہ

تمام گرداب خوں پہ پہرا بھی تھا اسی کا

اسی کا لمس گداز روشن کرے شب غم

ہوائے مست وصال کا سلسلہ اسی کا

اسی کے غم میں دھواں دھواں چشم رنگ و نغمہ

سو عکس زار خیال بھی معجزہ اسی کا

اسی کے ہونٹوں کے پھول باب قبول چومیں

سو ہم اٹھا لائیں اب کے حرف دعا اسی کا

اسی سے اجملؔ تمام فصل غبار صحرا

اداس آنکھوں میں پھر بھی روشن دیا اسی کا

hujum-e-sayyargan mein raushan diya usi ka

fasil-e-shab par bhi gul khilae hua usi ka

usi ki shah par taraf taraf raqs-e-mauj-e-girya

tamam girdab khun pe pahra bhi tha usi ka

usi ka lams-e-gudaz-e-raushan kare shab-e-gham

hawa-e-mast-e-wisal ka silsila usi ka

usi ke gham mein dhuan dhuan chashm-e-rang-o-naghma

so aks zar-e-khayal bhi mojiza usi ka

usi ke honton ke phul bab-e-qubul chumen

so ham utha laen ab ke harf-e-dua usi ka

usi se ajmal tamam fasl-e-ghubar-e-sahra

udas ankhon mein phir bhi raushan diya usi ka