شرار عشق صدیوں کا سفر کرتا ہوا

شرار عشق صدیوں کا سفر کرتا ہوا

بجھا مجھ میں مجھی کو بے خبر کرتا ہوا

رموز خاک باب مشتہر کرتا ہوا

یوں ہی آباد صحرائے ہنر کرتا ہوا

زمین جستجو گرد سفر کرتا ہوا

یہ مجھ میں کون ہے مجھ سے مفر کرتا ہوا

ابھی تک لہلہاتا ہے وہ سبزہ آنکھ میں

وہ موج گل کو معیار نظر کرتا ہوا

حریم شب میں خوں روتا ہوا ماہ تمام

نگار صبح قصہ مختصر کرتا ہوا

مری مٹی کو لے پہنچا دیار یار تک

غبار جاں طواف چشم تر کرتا ہوا

تکبر لے رہا ہے امتحاں پھر عزم کا

ستاروں کو مرے زیر اثر کرتا ہوا

فلک بوسی کی خواہش طائر وحشت کو تھی

اڑا ہے اپنی مٹی درگزر کرتا ہوا

sharar ishq sadiyon ka safar karta hua

bujha mujh mein mujhi ko be khabar karta hua

rumuz-e-khak bab-e-mushtahar karta hua

yun hi abad sahra-e-hunar karta hua

zamin-e-justuju gard-e-safar karta hua

ye mujh mein kaun hai mujh se mafar karta hua

abhi tak lahlahata hai wo sabza ankh mein

wo mauj-e-gul ko meyar-e-nazar karta hua

harim-e-shab mein khun rota hua mah-e-tamam

nigar-e-subh qissa mukhtasar karta hua

miri mitti ko le pahuncha dayar-e-yar tak

ghubar jan tawaf-e-chashm-e-tar karta hua

takabbur le raha hai imtihan phir azm ka

sitaron ko mire zer-e-asar karta hua

falak bosi ki khwahish tair-e-wahshat ko thi

ura hai apni mitti darguzar karta hua