ہوا کی زد پہ چراغ شب فسانہ تھا

ہوا کی زد پہ چراغ شب فسانہ تھا

مگر ہمیں بھی اسی سے دیا جلانا تھا

ہمیں بھی یاد نہ آئی بہار عشوہ طراز

اسے بھی ہجر کا موسم بہت سہانا تھا

سفر عذاب سہی دشت گمرہی کا مگر

کٹی طناب تو خیمہ اجڑ ہی جانا تھا

ہمیں نے رقص کیا نغمۂ فنا پر بھی

ہمیں ہی پلکوں پہ ہجرت کا بار اٹھانا تھا

اسی کی گونج ہے تار نفس میں اب کے میاں

صدائے ہو کو بھی ورنہ کسے جگانا تھا

ہم ایسے خاک نشینوں کا ذکر کیا کہ ہمیں

لہو کا قرض تو ہر حال میں چکانا تھا

وہ میرے خواب چرا کر بھی خوش نہیں اجملؔ

وہ ایک خواب لہو میں جو پھیل جانا تھا

hawa ki zad pe charagh-e-shab-e-fasana tha

magar hamen bhi usi se diya jalana tha

hamen bhi yad na ai bahar ishwa taraz

use bhi hijr ka mausam bahut suhana tha

safar azab sahi dasht gumrahi ka magar

kati tanab to khema ujar hi jana tha

hamen ne raqs kiya naghma-e-fana par bhi

hamen hi palkon pe hijrat ka bar uthana tha

usi ki gunj hai tar-e-nafas mein ab ke miyan

sadae ho ko bhi warna kise jagana tha

ham aise khak nashinon ka zikr kya ke hamen

lahu ka qarz to har hal mein chukana tha

wo mere khwab chura kar bhi khush nahin ajmal

wo ek khwab lahu mein jo phail jana tha