زمیں کے ساتھ فلک کے سفر میں ہم بھی ہیں

زمیں کے ساتھ فلک کے سفر میں ہم بھی ہیں

قفس نصیب سہی بال و پر میں ہم بھی ہیں

وہیں سے لوٹ گئی راستوں کی تنہائی

جہاں پہ اس نے یہ جانا سفر میں ہم بھی ہیں

تو وہ شجر جو سدا برگ و بار دیتا ہے

مثال آب نہاں اس شجر میں ہم بھی ہیں

جسے کہیں سے سمندر نے لا کے پھینک دیا

تمہارے ساتھ اک ایسے ہی گھر میں ہم بھی ہیں

کتاب تھے تو پڑھے جا سکے نہ دنیا سے

لو اب چراغ ہوئے رہ گزر میں ہم بھی ہیں

خیال آگ ہے شعلہ ہے فکر لو الفاظ

یہ سب ہنر ہیں تو پھر اس ہنر میں ہم بھی ہیں

متینؔ شہر بھی صحرا نژاد ہے اتنا

کہ سنگ و خشت میں دیوار و در میں ہم بھی ہیں

zamin ke sath falak ke safar mein ham bhi hain

qafas nasib sahi bal-o-par main ham bhi hain

wahin se laut gai raston ki tanhai

jahan pe us ne ye jana safar mein ham bhi hain

to wo shajar jo sada barg-o-bar deta hai

misal-e-ab nihan is shajar mein ham bhi hain

jise kahen se samundar ne la ke phenk diya

tumhare sath ik aise hi ghar mein ham bhi hain

kitab the to parhe ja sake na duniya se

lo ab charagh hue rah guzar mein ham bhi hain

khayal ag hai shola hai fikr lo alfaz

ye sab hunar hain to phir is hunar mein ham bhi hain

matin shahr bhi sahra nazhad hai itna

ke sang-o-khisht mein diwar-o-dar mein ham bhi hain