سائے ہیں گوش بر آواز ذرا آہستہ

سائے ہیں گوش بر آواز ذرا آہستہ

مونسو آج کی شب ذکر وفا آہستہ

چاند کے پاؤں رکے تھم گئے اڑتے بادل

ذکر کس عارض و گیسو کا چلا آہستہ

کتنے دن آئے کفن اوڑھے ہوئے خوابوں کا

شب نے کھولی تری یادوں کی قبا آہستہ

کیا خبر اگلے برس اجنبی ہو جائیں ہم

ٹوٹتے جاتے ہیں پیمان وفا آہستہ

آج پھر زخم تمنا سے مہک اٹھتی ہے

کوئی پیغام لیے آئی صبا آہستہ

آنکھ نے دیکھا نہ ہو دل تو مگر جانے ہے

کون دیتا ہے دریچوں پہ صدا آہستہ

sae hain gosh bar awaz zara ahista

muniso aj ki shab zikr-e-wafa ahista

chand ke paon ruke tham gae urte badal

zikr kis ariz-o-gesu ka chala ahista

kitne din ae kafan orhe hue khwabon ka

shab ne kholi tiri yadon ki qaba ahista

kya khabar agle baras ajnabi ho jaen ham

tutte jate hain paiman-e-wafa ahista

aj phir zakhm-e-tamanna se mahak uthti hai

koi paigham liye ai saba ahista

ankh ne dekha na ho dil to magar jane hai

kaun deta hai darichon pe sada ahista