نیرنگیٔ بہار جنوں ہم بھی دیکھ لیں

نیرنگیٔ بہار جنوں ہم بھی دیکھ لیں

کیا گل کھلائے گریۂ شبنم بھی دیکھ لیں

سنتے ہیں وہ ہے دشمن ایمان و آگہی

موج مئے نشاط کا عالم بھی دیکھ لیں

لے سر اٹھا رہے ہیں ترے آستاں سے ہم

ہوتا ہے کون عشق کا محرم بھی دیکھ لیں

شاید غم جہاں کے اسیروں کو راس آئے

آشفتگئ گیسوئے پر خم بھی دیکھ لیں

پالا پڑا ہے حسن تغافل شعار سے

ضبط جنون عشق کا دم خم بھی دیکھ لیں

آوارگیٔ فصل چمن چار دن سہی

کچھ ارتباط شعلہ و شبنم بھی دیکھ لیں

تیرے خیال ہی سے نہ ہوں راحتیں تمام

تجھ کو بھلا کے عشق کا عالم بھی دیکھ لیں

مدت ہوئی کہ آنکھ سے ٹپکا نہیں لہو

کس حال میں ہیں اہل وفا ہم بھی دیکھ لیں

وہ جن کو اعتماد خلوص وفا نہیں

فرقت میں چشم ناز کو پر نم بھی دیکھ لیں

nairangi-e-bahar-e-junun ham bhi dekh len

kya gul khilae girya-e-shabnam bhi dekh len

sunte hain wo hai dushman-e-iman-o-agahi

mauj-e-mai-e-nishat ka alam bhi dekh len

le sar utha rahe hain tire astan se ham

hota hai kaun ishq ka mahram bhi dekh len

shayad gham jahan ke asiron ko ras ae

ashuftagi-e-gesue par kham bhi dekh len

pala para hai husn-e-taghaful shiar se

zabt-e-junun-e-ishq ka dam kham bhi dekh len

awargi-e-fasl-e-chaman char din sahi

kuchh irtibat-e-shola-o-shabnam bhi dekh len

tere khayal hi se na hun rahaten tamam

tujh ko bhula ke ishq ka alam bhi dekh len

muddat hui ke ankh se tapka nahin lahu

kis hal mein hain ahl-e-wafa ham bhi dekh len

wo jin ko etimad khulus-e-wafa nahin

furqat mein chashm-e-naz ko pur nam bhi dekh len