بھٹک رہا ہوں خلاؤں میں گم شدہ کی طرح

بھٹک رہا ہوں خلاؤں میں گم شدہ کی طرح

سکوت سنگ نے ٹھکرا دیا صدا کی طرح

مرے وجود کو پگھلا رہی ہے برف کی آنچ

مگر وہ چپ سی لگی ہے مجھے خدا کی طرح

عجیب شہر ہے پرچھائیاں چمکتی ہیں

ہر اجنبی مجھے لگتا ہے آشنا کی طرح

چلا تھا گھر سے نکل کر پہاڑ کی جانب

پلٹ کے آ گیا بستی میں پھر صدا کی طرح

دھری رہے گی یہ خوشبو کی کھوکھلی زنجیر

ہر ایک رنگ سے اڑ جاؤں گا ہوا کی طرح

گری تھی اوس جو کل شب بدن کے صحرا میں

یہ بات پھیل گئی شہر میں وبا کی طرح

ہمیں ہواؤں کی ٹھوکر بھی راس آ نہ سکی

پڑے ہیں وقت کے رستے میں نقش پا کی طرح

bhatak raha hun khalaon mein gum shuda ki tarah

sukut-e-sang ne thukra diya sada ki tarah

mire wajud ko pighla rahi hai barf ki anch

magar wo chup si lagi hai mujhe khuda ki tarah

ajib shahr hai parchhaiyan chamakti hain

har ajnabi mujhe lagta hai ashna ki tarah

chala tha ghar se nikal kar pahar ki janib

palat ke a gaya basti mein phir sada ki tarah

dhari rahegi ye khushbu ki khokhli zanjir

har ek rang se ur jaunga hawa ki tarah

giri thi os jo kal shab badan ke sahra mein

ye bat phail gai shahr mein waba ki tarah

hamen hawaon ki thokar bhi ras a na saki

pare hain waqt ke raste mein naqsh-e-pa ki tarah