تنہائی کی گلی میں ہواؤں کا شور تھا

تنہائی کی گلی میں ہواؤں کا شور تھا

آنکھوں میں سو رہا تھا اندھیرا تھکا ہوا

سینے میں جیسے تیر سا پیوست ہو گیا

تھا کتنا دل خراش اداسی کا قہقہہ

یوں بھی ہوا کہ شہر کی سڑکوں پہ بارہا

ہر شخص سے میں اپنا پتہ پوچھتا پھرا

برسوں سے چل رہا ہے کوئی میرے ساتھ ساتھ

ہے کون شخص اس سے میں اک بار پوچھتا

دل میں اتر کے بجھ گئی یادوں کی چاندنی

آنکھوں میں انتظار کا سورج پگھل گیا

چھوڑی ہے ان کی چاہ تو اب لگ رہا ہے یوں

جیسے میں اتنے روز اندھیروں میں قید تھا

میں نے ذرا سی بات کہی تھی مذاق میں

تم نے ذرا سی بات کو اتنا بڑھا لیا

کمرے میں پھیلتا رہا سگریٹ کا دھواں

میں بند کھڑکیوں کی طرف دیکھتا رہا

آزرؔ یہ کس کی سمت بڑھے جا رہے ہیں لوگ

اس شہر میں تو میرے سوا کوئی بھی نہ تھا

tanhai ki gali mein hawaon ka shor tha

ankhon mein so raha tha andhera thaka hua

sine mein jaise tir sa paiwast ho gaya

tha kitna dil kharash udasi ka qahqaha

yun bhi hua ke shahr ki sarkon pe barha

har shakhs se main apna pata puchhta phira

barson se chal raha hai koi mere sath sath

hai kaun shakhs us se main ik bar puchhta

dil mein utar ke bujh gai yadon ki chandni

ankhon mein intizar ka suraj pighal gaya

chhori hai un ki chah to ab lag raha hai yun

jaise main itne roz andheron mein qaid tha

main ne zara si bat kahi thi mazaq mein

tum ne zara si bat ko itna barha liya

kamre mein phailta raha sigret ka dhuan

main band khirkiyon ki taraf dekhta raha

azar ye kis ki samt barhe ja rahe hain log

is shahr mein to mere siwa koi bhi na tha