سکوں تھوڑا سا پایا دھوپ کے ٹھنڈے مکانوں میں

سکوں تھوڑا سا پایا دھوپ کے ٹھنڈے مکانوں میں

بہت جلنے لگا تھا جسم برفیلی چٹانوں میں

کب آؤ گے یہ گھر نے مجھ سے چلتے وقت پوچھا تھا

یہی آواز اب تک گونجتی ہے میرے کانوں میں

جنازہ میری تنہائی کا لے کر لوگ جب نکلے

میں خود شامل تھا اپنی زندگی کے نوحہ خوانوں میں

مری محرومیاں جب پتھروں کے شہر سے گزریں

چھپایا سر تری یادوں کے ٹوٹے سائبانوں میں

مجھے میری انا کے خنجروں نے قتل کر ڈالا

بہانہ یہ بھی اک بے چارگی کا تھا بہانوں میں

تماشہ ہم بھی اپنی بے بسی کا دیکھ لیتے ہیں

تری یادوں کے پھولوں کو سجا کر پھول دانوں میں

زمیں پیروں کے چھالے روز چن لیتی ہے پلکوں سے

تخیل روز لے اڑتا ہے مجھ کو آسمانوں میں

میں اپنے آپ سے ہر دم خفا رہتا ہوں یوں آزرؔ

پرانی دشمنی ہو جس طرح دو خاندانوں میں

sukun thora sa paya dhup ke thande makanon mein

bahut jalne laga tha jism barfili chatanon mein

kab aoge ye ghar ne mujh se chalte waqt puchha tha

yahi awaz ab tak gunjti hai mere kanon mein

janaza meri tanhai ka le kar log jab nikle

main khud shamil tha apni zindagi ke nauha khwanon mein

miri mahrumiyan jab pattharon ke shahr se guzren

chhupaya sar tiri yadon ke tute saibanon mein

mujhe meri ana ke khanjaron ne qatl kar dala

bahana ye bhi ik be chargi ka tha bahanon mein

tamasha ham bhi apni be basi ka dekh lete hain

tiri yadon ke phulon ko saja kar phul danon mein

zamin pairon ke chhale roz chun leti hai palkon se

takhayyul roz le urta hai mujh ko asmanon mein

main apne ap se har dam khafa rahta hun yun azar

purani dushmani ho jis tarah do khandanon mein