دھوم گم گشتہ خزانوں کی مچاتا پھرے کون

دھوم گم گشتہ خزانوں کی مچاتا پھرے کون

ان زمانوں میں جو تھے ہی نہیں جاتا پھرے کون

باغ میں ان سے ملاقات کا امکان بھی ہے

صرف پھولوں کے لیے لوٹ کے آتا پھرے کون

سیکھ رکھے ہیں پرندوں نے سب اشجار کے گیت

آج کل موڈ ہی ایسا ہے کہ گاتا پھرے کون

میں تو کہتا ہوں یہیں غار میں رہ لو جب تک

وقت پوچھو ہی نہیں شہر بساتا پھرے کون

بھیس بدلے ہوئے اک شخص کی خاطر ہے یہ سب

ہم فقیروں کے بھلا ناز اٹھاتا پھرے کون

خواب یعنی یہ شب و روز جسے چاہیے ہوں

آ کے لے جائے اب آواز لگاتا پھرے کون

اختلافات سروں میں ہیں گھروں سے بڑھ کر

پھر اٹھانی جو ہے دیوار گراتا پھرے کون

dhum gum gashta khazanon ki machata phire kaun

in zamanon mein jo the hi nahin jata phire kaun

bagh mein un se mulaqat ka imkan bhi hai

sirf phulon ke liye laut ke ata phire kaun

sikh rakhe hain parindon ne sab ashjar ke git

aj kal mud hi aisa hai ke gata phire kaun

main to kahta hun yahin ghar mein rah lo jab tak

waqt puchho hi nahin shahr basata phire kaun

bhes badle hue ik shakhs ki khatir hai ye sab

ham faqiron ke bhala naz uthata phire kaun

khwab yaani ye shab-o-roz jise chahiye hun

a ke le jae ab awaz lagata phire kaun

ikhtilafat saron mein hain gharon se barh kar

phir uthani jo hai diwar girata phire kaun