مجھ سے اب تک یہ گلہ ہے مرے غم خواروں کو

مجھ سے اب تک یہ گلہ ہے مرے غم خواروں کو

کیوں چھوا میں نے تری یاد کے انگاروں کو

ذہن و دل حشر کے سورج کی طرح جلتے ہیں

جب سے چھوڑا ہے ترے شہر کی دیواروں کو

آج بھی آپ کی یادوں کے مقدس جھونکے

چھیڑ جاتے ہیں محبت کے گنہ گاروں کو

آرزو سوچ تڑپ درد کسک غم آنسو

ہم سے کیا کیا نہ ملا ہجر کے بازاروں کو

تیرے جلتے ہوئے ہونٹوں کی حرارت نہ ملی

میری تنہائی کے بھیگے ہوئے رخساروں کو

تم کو ماحول سے ہو جائے گی نفرت آزرؔ

اتنے نزدیک سے دیکھا نہ کرو یاروں کو

mujh se ab tak ye gila hai mire gham khwaron ko

kyun chhua main ne tiri yad ke angaron ko

zehn-o-dil hashr ke suraj ki tarah jalte hain

jab se chhora hai tire shahr ki diwaron ko

aj bhi ap ki yadon ke muqaddas jhonke

chher jate hain mohabbat ke gunah garon ko

arzu soch tarap dard kasak gham ansu

ham se kya kya na mila hijr ke bazaron ko

tere jalte hue honton ki hararat na mili

meri tanhai ke bhige hue rukhsaron ko

tum ko mahaul se ho jaegi nafrat azar

itne nazdik se dekha na karo yaron ko