رات کے دشت میں پھیلا ہوا سناٹا ہوں

رات کے دشت میں پھیلا ہوا سناٹا ہوں

اپنے سائے سے بچھڑنے کی سزا پاتا ہوں

میں کبھی اپنے لیے غیر نہیں تھا اتنا

آئینہ دیکھ کے کل رات بہت رویا ہوں

تم سے ملنے کی خوشی ہے نہ بچھڑنے کا ملال

خود فریبی کے اب اس موڑ پہ آ پہونچا ہوں

جب سے اک خواب کی تعبیر ملی ہے مجھ کو

میں ہر اک خواب کی تعبیر سے گھبراتا ہوں

کوئی ملتا ہی نہیں آنکھ ملانے والا

میں ترے شہر میں سورج کی طرح تنہا ہوں

زندگی کا کوئی مقصد ہی نہیں ہے آزرؔ

اور میں ہوں کہ ضرورت کی طرح زندہ ہوں

rat ke dasht mein phaila hua sannata hun

apne sae se bichharne ki saza pata hun

main kabhi apne liye ghair nahin tha itna

aina dekh ke kal rat bahut roya hun

tum se milne ki khushi hai na bichharne ka malal

khud farebi ke ab is mor pe a pahuncha hun

jab se ik khwab ki taabir mili hai mujh ko

main har ik khwab ki taabir se ghabrata hun

koi milta hi nahin ankh milane wala

main tire shahr mein suraj ki tarah tanha hun

zindagi ka koi maqsad hi nahin hai azar

aur main hun ke zarurat ki tarah zinda hun