ہم نے جب کوئی بھی دروازہ کھلا پایا ہے

ہم نے جب کوئی بھی دروازہ کھلا پایا ہے

کتنی گزری ہوئی باتوں کا خیال آیا ہے

قافلہ درد کا ٹھہرے گا کہاں ہم سفرو

کوئی منزل ہے نہ بستی نہ کہیں سایا ہے

ایک سہما ہوا سنسان گلی کا نکڑ

شہر کی بھیڑ میں اکثر مجھے یاد آیا ہے

یوں لیے پھرتا ہوں ٹوٹے ہوئے خوابوں کی صلیب

اب یہی جیسے مری زیست کا سرمایہ ہے

شہر میں ایک بھی آوارہ نہیں اب کے برس

موسم لالہ و گل کیسی خبر لایا ہے

ان کی ٹوٹی ہوئی دیوار کا سایہ آزرؔ

دھوپ میں کیوں مرے ہم راہ چلا آیا ہے

ham ne jab koi bhi darwaza khula paya hai

kitni guzri hui baton ka khayal aya hai

qafila dard ka thahrega kahan ham safaro

koi manzil hai na basti na kahin saya hai

ek sahma hua sunsan gali ka nukkar

shahr ki bhir mein aksar mujhe yad aya hai

yun liye phirta hun tute hue khwabon ki salib

ab yahi jaise miri zist ka sarmaya hai

shahr mein ek bhi awara nahin ab ke baras

mausam-e-lala-o-gul kaisi khabar laya hai

un ki tuti hui diwar ka saya azar

dhup mein kyun mire ham rah chala aya hai