گھٹاؤں کی اداسی پی رہا ہوں

گھٹاؤں کی اداسی پی رہا ہوں

میں اک گہرا سمندر بن گیا ہوں

تری یادوں کے انگاروں کو اکثر

تصور کے لبوں سے چومتا ہوں

کوئی پہچاننے والا نہیں ہے

بھرے بازار میں تنہا کھڑا ہوں

مرا قد کتنا اونچا ہو گیا ہے

فلک کی وسعتوں کو ناپتا ہوں

وہ یوں مجھ کو بھلانا چاہتے ہیں

کہ جیسے میں بھی کوئی حادثہ ہوں

بدلتے موسموں کی ڈائری سے

ترے بارے میں اکثر پوچھتا ہوں

مرے کمرے میں یادیں سو رہی ہیں

میں سڑکوں پر بھٹکتا پھر رہا ہوں

ابھرتے ڈوبتے سورج کا منظر

بسوں کی کھڑکیوں سے دیکھتا ہوں

کسی کی یاد کے پتوں کو آزرؔ

ہواؤں سے بچا کر رکھ رہا ہوں

ghataon ki udasi pi raha hun

main ik gahra samundar ban gaya hun

tiri yadon ke angaron ko aksar

tasawwur ke labon se chumta hun

koi pahchanne wala nahin hai

bhare bazar mein tanha khara hun

mira qad kitna uncha ho gaya hai

falak ki wusaton ko napta hun

wo yun mujh ko bhulana chahte hain

ke jaise main bhi koi hadisa hun

badalte mausamon ki dairi se

tire bare mein aksar puchhta hun

mire kamre mein yaden so rahi hain

main sarkon par bhatakta phir raha hun

ubharte dubte suraj ka manzar

bason ki khirkiyon se dekhta hun

kisi ki yad ke patton ko azar

hawaon se bacha kar rakh raha hun