پھر لوٹ کر گئے نہ کبھی دشت و در سے ہم

پھر لوٹ کر گئے نہ کبھی دشت و در سے ہم

نکلے بس ایک بار کچھ اس طرح گھر سے ہم

کچھ دور تک چلے ہی گئے بے خبر سے ہم

اے بے خودیٔ شوق یہ گزرے کدھر سے ہم

آزاد بے نیاز تھے اپنی خبر سے ہم

پلٹے کچھ اس طرح سے دکن کے سفر سے ہم

قلب و نظر کا دور بس اتنا ہی یاد ہے

وہ اک قدم ادھر سے بڑھے تھے ادھر سے ہم

اے کاش یہ صدا بھی کبھی کان میں پڑے

اٹھو کہ لوٹ آئے ہیں اپنے سفر سے ہم

دل کا چمن ہے کیف بہاراں لیے ہوئے

گزرے تھے ایک بار تری رہگزر سے ہم

آتا ہے اک ستارہ نظر چاند کے قریب

جب دیکھتے ہیں خود کو تمہاری نظر سے ہم

اس سے زیادہ دور جنوں کی خبر نہیں

کچھ بے خبر سے آپ تھے کچھ بے خبر سے ہم

جتنی بھی رہ گئی تھی کمی دل کے درد میں

اتنا ہی لٹ گئے ہیں متاع نظر سے ہم

روز ازل سے اپنی جبیں میں تڑپ رہی

وابستہ یوں رہے ہیں ترے سنگ در سے ہم

phir laut kar gae na kabhi dasht-o-dar se ham

nikle bas ek bar kuchh is tarah ghar se ham

kuchh dur tak chale hi gae be khabar se ham

ai be khudi-e-shauq ye guzre kidhar se ham

azad be niyaz the apni khabar se ham

palte kuchh is tarah se dakan ke safar se ham

qalb-o-nazar ka daur bas itna hi yad hai

wo ik qadam idhar se barhe the idhar se ham

ai kash ye sada bhi kabhi kan mein pare

utho ke laut ae hain apne safar se ham

dil ka chaman hai kaif-e-baharan liye hue

guzre the ek bar tiri rahguzar se ham

ata hai ik sitara nazar chand ke qarib

jab dekhte hain khud ko tumhari nazar se ham

is se ziyada daur-e-junun ki khabar nahin

kuchh be khabar se ap the kuchh be khabar se ham

jitni bhi rah gai thi kami dil ke dard mein

itna hi lut gae hain mata-e-nazar se ham

roz-e-azal se apni jabin mein tarap rahi

wabasta yun rahe hain tire sang-e-dar se ham