جلوہ ترا اس طرح سے ناکام نہ ہوتا

جلوہ ترا اس طرح سے ناکام نہ ہوتا

ہم طور پہ ہوتے تو یہ انجام نہ ہوتا

سنتا میں کہاں واعظ ناداں کی نصیحت

گر وعظ و نصیحت میں ترا نام نہ ہوتا

غنچے کی چٹک دل کی تہوں میں نہ اترتی

اس میں جو نہفتہ ترا پیغام نہ ہوتا

یہ رزق کی ہے کور نگاہی کی نہیں بات

دانہ بھی نہ ہوتا جو کہیں دام نہ ہوتا

کٹتا بھلا کیونکر شب فرقت کا اندھیرا

پلکوں پہ چراغاں جو سر شام نہ ہوتا

آزادؔ نشیمن سے قفس میں جو نہ آتے

اس وقت جو حاصل ہے وہ آرام نہ ہوتا

jalwa tira is tarah se nakam na hota

ham tur pe hote to ye anjam na hota

sunta main kahan waiz nadan ki nasihat

gar waaz-o-nasihat mein tira nam na hota

ghunche ki chutak dil ki tahon mein na utarti

is mein jo nihufta tira paigham na hota

ye rizq ki hai kor nigahi ki nahin bat

dana bhi na hota jo kahin dam na hota

katta bhala kyunkar shab-e-furqat ka andhera

palkon pe charaghan jo sar-e-sham na hota

azad nasheman se qafas mein jo na ate

is waqt jo hasil hai wo aram na hota