عارض اشکوں سے ترے تر نہیں دیکھے جاتے

عارض اشکوں سے ترے تر نہیں دیکھے جاتے

خاک میں رلتے یہ گوہر نہیں دیکھے جاتے

دیکھ سکتا ہوں زمانے کی بدلتی نظریں

تیرے بدلے ہوئے تیور نہیں دیکھے جاتے

آئنہ بھی رخ روشن کے مقابل نہ رہے

ہم سے کوئی ترے ہمسر نہیں دیکھے جاتے

دل کے ساگر میں جو ہر شام و سحر اٹھتے ہیں

وہ تلاطم کبھی باہر نہیں دیکھے جاتے

مسکراتے ہوئے چہرے پہ نظر سب کی پڑی

زخم دل کے مگر اکثر نہیں دیکھے جاتے

حسن کے جلوے جو دیکھے ترے دیوانے نے

ہوش والوں سے وہ اکثر نہیں دیکھے جاتے

قدر کر قدر مرے ذوق نظر کی ساقی

سب حسیں یوں تو مکرر نہیں دیکھے جاتے

میکدہ اپنا ہے اور بادہ و ساقی اپنے

غیر کے ہاتھ میں ساغر نہیں دیکھے جاتے

یہ حسیں وادی و دریا گل و گلزار حبیبؔ

بن ترے مجھ سے یہ منظر نہیں دیکھے جاتے

ariz ashkon se tire tar nahin dekhe jate

khak mein rulte ye gauhar nahin dekhe jate

dekh sakta hun zamane ki badalti nazren

tere badle hue tewar nahin dekhe jate

aina bhi rukh-e-raushan ke muqabil na rahe

ham se koi tire hamsar nahin dekhe jate

dil ke sagar mein jo har sham-o-sahar uthte hain

wo talatum kabhi bahar nahin dekhe jate

muskurate hue chehre pe nazar sab ki pari

zakhm-e-dil ke magar aksar nahin dekhe jate

husn ke jalwe jo dekhe tire diwane ne

hosh walon se wo aksar nahin dekhe jate

qadr kar qadr mire zauq-e-nazar ki saqi

sab hasin yun to mukarrar nahin dekhe jate

maikada apna hai aur bada-o-saqi apne

ghair ke hath mein saghar nahin dekhe jate

ye hasin wadi-o-dariya gul-o-gulzar habib

bin tire mujh se ye manzar nahin dekhe jate