خواب آنکھوں کی گلی چھوڑ کے جانے نکلے

خواب آنکھوں کی گلی چھوڑ کے جانے نکلے

ہم ادھر نیند کی دیوار گرانے نکلے

دھول رستے کا مقدر ہے تو رستہ کیا ہے

بس یہی بات زمانے کو بتانے نکلے

جب پہاڑوں سے ملی داد ہنر کی اپنے

داستاں ہم بھی سمندر کو سنانے نکلے

رنگ سے رنگ جدا ہونے کا منظر دیکھا

تیرگی اور شفق صرف بہانے نکلے

جب سمندر پہ چلے ہم تو یہ صحرا چپ تھے

اب پہاڑی پہ کھڑے ہیں تو بلانے نکلے

آسماں جس کی زمیں ہے وہ پرندہ ہوں میں

جانے کیوں لوگ یہاں دام بچھانے نکلے

کوئی چہرہ نہ دے آواز کسی لو سے متینؔ

شام ہوتے ہی چراغوں کو بجھانے نکلے

khwab ankhon ki gali chhor ke jane nikle

ham idhar nind ki diwar girane nikle

dhul raste ka muqaddar hai to rasta kya hai

bas yahi bat zamane ko batane nikle

jab paharon se mili dad-e-hunar ki apne

dastan ham bhi samundar ko sunane nikle

rang se rang juda hone ka manzar dekha

tirgi aur shafaq sirf bahane nikle

jab samundar pe chale ham to ye sahra chup the

ab pahari pe khare hain to bulane nikle

asman jis ki zamin hai wo parinda hun main

jane kyun log yahan dam bichhane nikle

koi chehra na de awaz kisi lau se matin

sham hote hi charaghon ko bujhane nikle