جب سے نظر سے دور وہ پیارے چلے گئے

جب سے نظر سے دور وہ پیارے چلے گئے

وہ شام وہ سحر وہ نظارے چلے گئے

رسم وفا نہ پیار کی پہلی سی ریت ہے

جانے کہاں وہ پریت کے دھارے چلے گئے

ہم کھیلتے ہی رہ گئے طوفان و موج سے

آ آ کے پاس دور کنارے چلے گئے

منزل کی دھن میں راہی نے دیکھا نہ اک نظر

دل کش مقام کرتے اشارے چلے گئے

آتش فشاں سا سینہ بھی اب سرد ہو گیا

شعلے چلے گئے وہ شرارے چلے گئے

سونا ہے حسن اور فضائیں اداس ہیں

محفل سے جب وہ عشق کے مارے چلے گئے

سودا نہیں یہ عشق کی بازی ہے بے خبر

جیتے وہی جہاں میں جو ہارے چلے گئے

دیر و حرم سے دور ترے آستاں سے دور

ہم رہ گزر میں رات گزارے چلے گئے

محفل بڑھاؤ شمع کو بھی گل کرو کہ اب

وہ دوست وہ حبیبؔ وہ پیارے چلے گئے

jab se nazar se dur wo pyare chale gae

wo sham wo sahar wo nazare chale gae

rasm-e-wafa na pyar ki pahli si ret hai

jane kahan wo prit ke dhare chale gae

ham khelte hi rah gae tufan-o-mauj se

a a ke pas dur kinare chale gae

manzil ki dhun mein rahi ne dekha na ik nazar

dil kash maqam karte ishare chale gae

atish fishan sa sina bhi ab sard ho gaya

shole chale gae wo sharare chale gae

sona hai husn aur fazaen udas hain

mahfil se jab wo ishq ke mare chale gae

sauda nahin ye ishq ki bazi hai be khabar

jite wahi jahan mein jo hare chale gae

dair-o-haram se dur tire astan se dur

ham rah guzar mein rat guzare chale gae

mahfil barhao shama ko bhi gul karo ke ab

wo dost wo habib wo pyare chale gae