کہہ چکے حال راز باقی ہے — JaiKrishn Chaudhry Habeeb

کہہ چکے حال راز باقی ہے

ناز اٹھائے نیاز باقی ہے

منزل عشق طے ہوئی پھر بھی

راہ دور و دراز باقی ہے

تو نے نغمے بھی دل سے چھین لیے

تار ٹوٹے ہیں ساز باقی ہے

سجدوں سے بندگی نہیں ہوتی

سر جھکا ہے نماز باقی ہے

دل تو تیروں سے ہو گیا چھلنی

اور ابھی مشق ناز باقی ہے

صحبت شب تو ہو گئی آخر

ایک غم جاں گداز باقی ہے

ترک الفت کے باوجود حبیبؔ

دل میں ایک فتنہ ساز باقی ہے