اس شوخ کے لطیف اشاروں کو دیکھیے

اس شوخ کے لطیف اشاروں کو دیکھیے

بکھرے ہوئے حسین نظاروں کو دیکھیے

ہر ایک شے میں اس کا ہی جلوہ ہے رو بہ رو

یہ ایک دیکھیے کہ ہزاروں کو دیکھیے

نظروں میں گر سمایا ہے اس یار کا جمال

در در گلی گلی میں نگاروں کو دیکھیے

یہ کس کے رنگ و روپ کا عکس جمیل ہے

چھائی ہوئی چمن میں بہاروں کو دیکھیے

نیرنگی حیات ہے ہر سمت جلوہ گر

طوفاں کو دیکھیے کہ کناروں کو دیکھیے

پردے اٹھا کے آج شبستان عیش کے

ہاں اک نگاہ درد کے ماروں کو دیکھیے

الفت میں تیری ہار چکے ہیں جو جان و دل

اپنے کبھی تو سینہ فگاروں کو دیکھیے

کیوں عمر مختصر کو کریں وقف رنج و غم

دم بھر تو زندگی کی بہاروں کو دیکھیے

دم بھر کہیں تھمیں نہ یہ روکے کہیں رکیں

اس قلزم حیات کے دھاروں کو دیکھیے

سیر چمن نہ یار نہ مطرب نہ شغل مے

کیا دیکھ کر حبیبؔ بہاروں کو دیکھیے

us shokh ke latif isharon ko dekhiye

bikhre hue hasin nazaron ko dekhiye

har ek shai mein us ka hi jalwa hai ru ba ro

ye ek dekhiye ke hazaron ko dekhiye

nazron mein gar samaya hai us yar ka jamal

dar dar gali gali mein nigaron ko dekhiye

ye kis ke rang-o-rup ka aks-e-jamil hai

chhai hui chaman mein baharon ko dekhiye

nairangi-e-hayat hai har samt jalwa gar

tufan ko dekhiye ke kinaron ko dekhiye

parde utha ke aj shabistan-e-aish ke

han ik nigah dard ke maron ko dekhiye

ulfat mein teri har chuke hain jo jan-o-dil

apne kabhi to sina figaron ko dekhiye

kyun umr-e-mukhtasar ko karen waqf-e-ranj-o-gham

dam bhar to zindagi ki baharon ko dekhiye

dam bhar kahin thamen na ye roke kahin ruken

is qulzum-e-hayat ke dharon ko dekhiye

sair-e-chaman na yar na mutrib na shaghl-e-mai

kya dekh kar habib baharon ko dekhiye