یاد ایام رفتہ یوں آئے

یاد ایام رفتہ یوں آئے

دھندلے دھندلے سے جیسے کچھ سائے

جیسے اڑتے ہوئے پرندے کا

نغمہ دم بھر فضا میں لہرائے

جیسے ویران دل کے گلشن میں

چپکے چپکے بہار آ جائے

سونی سونی سی جیسے محفل میں

دفعتاً جان انتظار آئے

جیسے ابر سیہ کے پردے میں

چاند کی اک کرن تھرک جائے

جیسے سنسان رہ گزاروں میں

یک بیک اک چراغ جل جائے

یا کوئی رند تشنہ لب جیسے

دست ساقی سے جام پا جائے

جیسے مہجور ایک غزل گا کر

اپنے غمگین دل کو بہلائے

جیسے تاریک شب کا سناٹا

نغمۂ لے سے ٹوٹتا جائے

ایک طوفاں زدہ مسافر کے

جیسے ساحل قریب آ جائے

جیسے تپتے سے ریگزاروں میں

ابر رحمت ذرا برس جائے

جیسے پہلی کرن سویرے کی

روزن شب سے جھانکتی جائے

جیسے باد صبا کے جھونکوں سے

غم کے ماروں کو نیند آ جائے

جیسے غربت میں بھٹکے راہی کو

اک پیام حبیبؔ آ جائے

yad-e-ayyam-e-rafta yun ae

dhundle dhundle se jaise kuchh sae

jaise urte hue parinde ka

naghma dam bhar faza mein lahrae

jaise wiran dil ke gulshan mein

chupke chupke bahar a jae

suni suni si jaise mahfil mein

dafatan jan-e-intizar ae

jaise abr-e-siyah ke parde mein

chand ki ik kiran thirak jae

jaise sunsan rah guzaron mein

yak bayak ik charagh jal jae

ya koi rind-e-tishna lab jaise

dast-e-saqi se jam pa jae

jaise mahjur ek ghazal ga kar

apne ghamgin dil ko bahlae

jaise tarik shab ka sannata

naghma-e-le se tutta jae

ek tufan zada musafir ke

jaise sahil qarib a jae

jaise tapte se regzaron mein

abr-e-rahmat zara baras jae

jaise pahli kiran sawere ki

rauzan-e-shab se jhankti jae

jaise bad-e-saba ke jhonkon se

gham ke maron ko nind a jae

jaise ghurbat mein bhatke rahi ko

ik payam-e-habib a jae