نصیبہ جاگ اٹھا اور مقدر بن گیا اپنا

نصیبہ جاگ اٹھا اور مقدر بن گیا اپنا

جہاں دیوار ہے اس کی وہیں گھر بن گیا اپنا

نہ جانے دھوپ نے اپنی زباں میں کیا کہہ اس سے

شجر کے جسم سے سایہ نکل کر بن گیا اپنا

ہماری آنکھ سے نیندوں کا رشتہ توڑنے والے

کوئی تجھ سے سوا خوش رنگ پیکر بن گیا اپنا

ہمارا سر سلامت ہی رہا سنگ حوادث میں

جو پتھر بھی ادھر آیا وہ پتھر بن گیا اپنا

سفر میں ساتھ اپنے دھوپ دریا اور سمندر تھے

ہماری خوش نصیبی تھی سمندر بن گیا اپنا

ہوا بارش سمندر کا کنارہ اور ہم دونوں

کچھ ایسے کھو گئے منظر میں منظر بن گیا اپنا

یہی بارش کا موسم تھا ہوائیں تیز تھیں اس دن

بہت بھیگا ہوا تھا وہ سمٹ کر بن گیا اپنا

متینؔ اک عمر گزری ہے سخن کو آب دینے میں

تبھی الماس لہجہ سب سے ہٹ کر بن گیا اپنا

nasiba jag utha aur muqaddar ban gaya apna

jahan diwar hai us ki wahin ghar ban gaya apna

na jane dhup ne apni zaban mein kya kah us se

shajar ke jism se saya nikal kar ban gaya apna

hamari ankh se nindon ka rishta torne wale

koi tujh se siwa khush rang paikar ban gaya apna

hamara sar salamat hi raha sang-e-hawadis mein

jo patthar bhi idhar aya wo patthar ban gaya apna

safar mein sath apne dhup dariya aur samundar the

hamari khush nasibi thi samundar ban gaya apna

hawa barish samundar ka kinara aur ham donon

kuchh aise kho gae manzar mein manzar ban gaya apna

yahi barish ka mausam tha hawaen tez thin us din

bahut bhiga hua tha wo simat kar ban gaya apna

matin ik umr guzri hai sukhan ko ab dene mein

tabhi almas lahja sab se hat kar ban gaya apna