Arooz is now on the App Store, for iPhone and iPad. Download →

All poetry

امید دید کام آئے نہ آئے

JaiKrishn Chaudhry Habeeb (b. 1904)

امید دید کام آئے نہ آئے

سحر آئی ہے شام آئے نہ آئے

میسر ہے نگاہ لطف ساقی

ہمیں کیا دور جام آئے نہ آئے

شراب آنکھوں ہی آنکھوں میں نہ پی لوں

مرے لب تک وہ جام آئے نہ آئے

صبا کرتی تو ہے کوشش برابر

ترا طرز خرام آئے نہ آئے

کلی چٹکی پہنچ جائے گی بلبل

صبا لے کر پیام آئے نہ آئے

مرے دل میں ہے اس کا لطف گفتار

بت شیریں کلام آئے نہ آئے

سراپا پیکر تسلیم ہوں میں

کبھی ان کا سلام آئے نہ آئے

انہیں آتی ہے میری یاد اب بھی

زباں پر میرا نام آئے نہ آئے

بنا لے جاوداں الفت سے اس کو

کبھی پھر ایسی شام آئے نہ آئے

میں راہی ہوں ہے چلنا کام میرا

کوئی دل کش مقام آئے نہ آئے

نگاہیں ان کی سب کچھ کہہ گئی ہیں

کوئی لے کر پیام آئے نہ آئے

حبیبؔ اہل زباں سے ہم سخن ہوں

وہ انداز کلام آئے نہ آئے